ភ្នំពេញ៖ ទីបំផុតស្ថាប័នព័ត៌មានអនឡាញ VOD បានចេញលិខិតសុំទោសជាផ្លូវការហើយបន្ទាប់ត្រូវបាននាយករដ្ឋមន្ត្រីកម្ពុជា សម្ដេចតេជោ ហ៊ុន សែន ព្រមានដកអាជ្ញាប័ណ្ណក្រោយពីសារព័ត៌មានមួយនេះចុះផ្សាយព័ត៌មានមិនពិតប៉ះពាល់ដល់មុខមាត់រដ្ឋាភិបាល។ 

ក្នុងលិខិតមួយច្បាប់ផ្ញើជូននាយករដ្ឋមន្ត្រីកម្ពុជាចុះថ្ងៃទី១២ ខែកុម្ភៈ ឆ្នាំ២០២៣ ប្រធានស្ដីទីមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ដែលជាអង្គការគ្រប់គ្រងសារព័ត៌មានអនឡាញ VOD លោកស្រី ឆន សុគន្ធ បានបញ្ជាក់ថា វីអូឌី ពិតជាមានការសោកស្តាយជាពន់ពេកចំពោះការផ្សព្វផ្សាយព័ត៌មានដែលបានធ្វើឱ្យប៉ះពាល់ដល់កិត្តិយសរបស់លោកបណ្ឌិត ហ៊ុន ម៉ាណែត និងរាជរដ្ឋាភិបាលដែលមានសម្ដេចជាប្រមុខដឹកនាំ។

លោកស្រីបន្តថា៖ «វីអូឌី សូមទោសសម្តេចផ្ទាល់ក៏ដូចជា ឯកឧត្តមបណ្ឌិត ហ៊ុន ម៉ាណែត ចំពោះការផ្សាយអត្ថបទព័ត៌មាននោះ។ សូមសម្តេចនាយករដ្ឋមន្ត្រីមេត្តាទទួលនូវការគោរពដ៏ខ្ពង់ខ្ពស់ពីយើងខ្ញុំ»។

គួរឱ្យដឹងផងដែរថាចាប់ពីថ្ងៃទី៩ ខែកុម្ភៈ សារព័ត៌មាន VOD ខេមរៈភាសាបានផ្សាយព័ត៌មានថាលោក ហ៊ុន ម៉ាណែត បានចុះហត្ថលេខាជំនួសនាយករដ្ឋមន្ត្រី សម្ដេចតេជោ ហ៊ុន សែន ក្នុងការផ្ដល់ជំនួយទៅកាន់ប្រទេសតួកគី។ 

ការនេះបានបង្កឲ្យមានការច្រានចោលពីលោក ហ៊ុន ម៉ាណែត ផ្ទាល់ហើយបន្ទាប់ពីនាយករដ្ឋមន្ត្រីសម្ដេចតេជោបានអញ្ជើញមកដល់កម្ពុជា សម្ដេចក៏បានប្រកាសទុកពេល ៧២ម៉ោងឲ្យសារព័ត៌មានមួយនេះចេញមុខសុំទោសចំពោះរាជរដ្ឋាភិបាលនិងលោក ហ៊ុន ម៉ាណែត ផងដែរ។

បន្ថែមលើនេះសម្ដេចតេជោបានសរសេរនៅលើហ្វេសប៊ុករបស់សម្ដេចនៅថ្ងៃទី១២ ខែកុម្ភៈ ដោយបាននកាត់បន្ថយពេលមកត្រឹម ២៤ម៉ោងប៉ុណ្ណោះ។ 

ក្រោយពីទទួលបានការព្រមាន VOD បានផ្ញើលិខិតមួយច្បាប់ជូនសម្ដេចតេជោ នៅរសៀលថ្ងៃទី១២ ខែកុម្ភៈ បើទោះជាយ៉ាងណាក្នុងលិខិតនោះបានប្រើប្រាស់ពាក្យសោកស្ដាយជំនួសពាក្យសុំទោសវិញ។

នាយករដ្ឋមន្ត្រីកម្ពុជា សម្តេចតេជោ ហ៊ុន សែន ថាសម្ដេចមិនអាចទទួលយកបានឡើយនូវការបង្ហាញការសោកស្តាយ និងសុំអធ្យាស្រ័យពីវិទ្យុ VOD ជំនួសនូវពាក្យ «សុំទោស» ហើយសម្តេចសម្រេចបញ្ជាឱ្យក្រសួងព័ត៌មានលុបអាជ្ញាប័ណ្ណវិទ្យុ VOD ដោយត្រូវបញ្ចប់ការផ្សាយចាប់ពីថ្ងៃស្អែកព្រឹកម៉ោង១០ ថ្ងៃទី១៣ ខែកុម្ភៈ ឆ្នាំ២០២៣ តទៅ។ 

ទោះជាយ៉ាងណាមិនទាន់មានការសម្រេចថ្មីពីសម្ដេចតេជោ ហ៊ុន សែន លើជោគវាសនានៃសារព័ត៌មានអនឡាញមួយនេះនៅឡើយទេ៕

ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាក់ថាការបិទសារព័ត៌មាន VOD គឺវាមិនធ្វើឲ្យប៉ះពាល់ទៅដល់សេរីភាពសហព័ត៌មាននៅកម្ពុជានោះទេផ្ទុយទៅវិញគឺនឹងពង្រឹងនូវការអនុវត្តច្បាប់នូវវិជ្ជាជីវៈសារព័ត៌មាននៅកម្ពុជាថែមទៀត។

សម្រេចតេជោ ហ៊ុន សែន បានលើកឡើងដោយបានឆ្លើយតបទៅនឹងការសរសេរយោបល់នៅលើ facebook របស់សម្ដេចទាក់ទងទៅនឹងការបញ្ជាដកអាជ្ញាប័ណ្ណសារព័ត៌មានអនឡាញ VOD នៅត្រឹមម៉ោង១០ព្រឹក ថ្ងៃទី១៣ ខែកុម្ភៈ ស្អែកនេះ។

សម្ដេចតេជោបានសរសេរថា៖ «ពាក្យអធ្យាស្រ័យនិងពាក្យសុំទោសវាខុសគ្នា។ បិទវិទ្យុមិនគោរពក្រមសីលធម៌មួយវាមិនធ្វើឲ្យស្លាប់សេរីភាព សារព័ត៌មាននៅកម្ពុជានោះទេ ផ្ទុយទៅវិញវានិងជួយពង្រឹងដល់ការអនុវត្តច្បាប់និងវិជ្ជាជីវៈសារព័ត៌មាននៅកម្ពុជា»។

ជាមួយនឹងការបកស្រាយពីសម្ដេចតេជោក៏មានអ្នកចូលទៅផ្ដល់យោបល់បន្ថែមផងដែរ។

អ្នកផ្ដល់យោបល់ដែលមានឈ្មោះ CHAP VANDETH បានលើកឡើងថា៖ «Vicheika Kann ពាក្យ​ទាំង​ពីរ​នេះ​មាន​ន័យ​ខុស​គ្នា​បង​ស្រី -ពាក្យ​ សូម​អធ្យាស្រ័យ​ គឺ​មាន​ន័យ​ថា​ពឹង​ ឬ​ចង់​អោយ​នរណា​ម្នាក់​ប្រាប់​ ហេតុ​អ្វី​មួយ​...​ឧទាហរណ៍​៖​ សូម​អធ្យាស្រ័យ​បង​ តេី​ផ្លូវ​នេះ​ទៅ​ភូមិ​ណា​ដែរ?

-ពាក្យ​ សុំទោស​ គឺ​មាន​ន័យ​ថា​ ការ​អង្វរ​ អោយ​គេ​អត់​ទោសអោយ​...ឧទាហរណ៍​ ខ្ញុំ​សុំទោស​ផង​ ដែល​ដេីរ​ប៉ះ​អ្នក​»។

អ្នកផ្ដល់យោបល់ឈ្មោះហ្វេសបុក បានលើកឡើងថា៖ «Vicheika Kann ដូចជាមិនមានអីត្រូវចុះខ្សោយនោះទេ ក្នុងវិស័យសារព័តមានក្នុងប្រទេសកម្ពុជា ទោះត្រូវបិទ VOD នោះ។ ហើយមុនការសម្រេចចិត្តបិទ VOD សម្តេចលោកបានទុកឱកាសជូនហើយ គ្រាន់ការ #សុំទោស# ដើម្បីលាងកំហុសខ្លួនឯង VOD ធ្វើអត់បានផងហ្នឹង ចឹងទេចំពោះខ្ញុំផ្ទាល់សូមគាំទ្រចំពោះចំណាត់ការចំពោះ VOD និងគាំទ្រការសម្រេចចិត្តដ៏ត្រឹមត្រូវរបស់សម្តេច ដើម្បីកុំអោយអ្នកផ្សេងយកគំរូតាម»។

សូមបញ្ជាក់ថា នាយករដ្ឋមន្ត្រីកម្ពុជា សម្តេចតេជោ ហ៊ុន សែន ថាសម្ដេចមិនអាចទទួលយកបានឡើយនូវការបង្ហាញការសោកស្តាយ និងសុំអធ្យាស្រ័យពីវិទ្យុ VOD ជំនួសនូវពាក្យ «សុំទោស» ហើយសម្តេចសម្រេចបញ្ជាឱ្យក្រសួងព័ត៌មានលុបអាជ្ញាប័ណ្ណវិទ្យុ VOD ដោយត្រូវបញ្ចប់ការផ្សាយចាប់ពីថ្ងៃស្អែកព្រឹកម៉ោង១០ ថ្ងៃទី១៣ ខែកុម្ភៈ ឆ្នាំ២០២៣ តទៅ៕

ភ្នំពេញ៖ ជាង១ម៉ោងក្រោយការប្រកាសរបស់នាយករដ្ឋមន្ត្រី សម្តេចតេជោ ហ៊ុន សែន ឲ្យបញ្ជាបិទសារព័ត៌មាន VOD រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានចេញសារមួយដែរ ដោយសរសេរថា នេះជាមេរៀនដល់ស្ថាប័នផ្សព្វផ្សាយព័ត៌មានឯទៀត ដែលប្រើភាសាការទូតជំនួសពាក្យ «សូមទោស»។

លើបណ្ដាញសង្គមហ្វេសប៊ុករបស់ខ្លួន លោករដ្ឋមន្ត្រីសរសេរដូច្នេះ៖ «តំណក់ចុងក្រោយដែលធ្វើអោយទឹកហៀរចេញពីធុង! មិនដឹងអ្នកណាជាអ្នកអោយយោបល់ VOD! តែមានតែស្ថានទូតទេ ដែលប្រឹងចៀសមិនប្រើពាក្យ «សូមទោស»! ស្ថាប័នកាសែតប្រើភាសាទូតទោះចង់ជួយក៏ពិតជាយ៉ាប់ហើយ!»។

យ៉ាងណាក៏ដោយករណីនេះ លោករដ្ឋមន្ត្រី បានក្រើនរំលឹកថា នេះក៏ជាមេរៀនដល់ស្ថាប័នផ្សព្វផ្សាយព័ត៌មានឯទៀតដែរ ហើយស្ថាប័នដែលមិនព្រមចុះការបំភ្លឺរបស់គេអាចប្រឈមនឹងការដកអាជ្ញាប័ណ្ណដូចគ្នា។

សូមបញ្ជាក់ថា នាយករដ្ឋមន្ត្រីកម្ពុជា សម្តេចតេជោ ហ៊ុន សែន មិនអាចទទួលយកបានឡើយនូវការបង្ហាញការសោកស្តាយ និងសុំអធ្យាស្រ័យពីវិទ្យុ VOD ជំនួសនូវពាក្យសុំទោស ហើយសម្តេចសម្រេចបញ្ជាឱ្យក្រសួងព័ត៌មានលុបអាជ្ញាប័ណ្ណវិទ្យុ VOD ដោយត្រូវបញ្ចប់ការផ្សាយចាប់ពីថ្ងៃស្អែកព្រឹកម៉ោង១០ ថ្ងៃទី១៣ ខែកុម្ភៈ ឆ្នាំ២០២៣ តទៅ៕

ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន មិនអាចទទួលយកបានឡើយនូវការសុំអធ្យាស្រ័យពីវិទ្យុ VOD ហើយសម្តេចសម្រេចបញ្ជាឱ្យក្រសួងព័ត៌មានលុបអាជ្ញាប័ណ្ណវិទ្យុ VOD ដោយត្រូវបញ្ចប់ការផ្សាយចាប់ពីថ្ងៃស្អែកព្រឹកម៉ោង១០ ថ្ងៃទី១៣ ខែកុម្ភៈ ឆ្នាំ២០២៣ តទៅ។

ទោះបីទទួលបានលិខិតបង្ហាញការសោកស្ដាយ និងសុំអធ្យាស្រ័យពីវិទ្យុ VOD សម្តេចតេជោ សម្រេចរក្សាបទបញ្ជាឲ្យលុបអាជ្ញាប័ណ្ណស្ថាប័នសារព័ត៌មាន VOD ដដែល។

សម្តេចបានសរសេរក្នុងហ្វេសប៊ុកផ្លូវការដូច្នេះថា៖ «តើការប្រើពាក្យសោកស្តាយនិងសូមអធ្យាស្រ័យវាជំនួសឲ្យពាក្យសុំទោសបានដែរឬទេ? សម្រាប់ខ្ញុំមិនអាចទទួលយកបានឡើយ។ ដើម្បីកុំឲ្យវែងឆ្ងាយខ្ញុំសម្រេចមិនទទួលយកការសំដែងការសោកស្តាយនិងសូមការអធ្យាស្រ័យជំនួសឲ្យការសុំទោសរបស់អស់លោកដែលជាសេចក្តីថ្លៃថ្នូរនិងកិត្តិយសរបស់អស់លោកនោះឡើយ»។

ចាប់ពីថ្ងៃស្អែកព្រឹកម៉ោង១០ ថ្ងៃទី១៣ ខែកុម្ភៈ ឆ្នាំ២០២៣ តទៅ ការផ្សាយរបស់ VOD នឹងត្រូវបញ្ចប់ ហើយសម្ដេចនាយករដ្ឋមន្ត្រីក៏បានស្នើឲ្យសាលារាជធានីភ្នំពេញនិងស្ថាប័នពាក់ពន្ធ័ជួយការពារសណ្តាប់ធ្នាប់និងទ្រព្យសម្បត្តិនៃវិទ្យុនេះឲ្យបានគង់វង្ស។ សម្ដេចសង្កត់ធ្ងន់ថា៖ «យើងបិទតែការផ្សាយគ្រប់ប្រភេទនៃវិទ្យុនេះប៉ុណ្ណោះតែយើងមិនប៉ៈពាល់ទ្រព្យសម្បត្តិរបស់គេទេ»៕

ភ្នំពេញ៖ សារព័ត៌មានអនឡាញ VOD នឹងដាក់លិខិតបកស្រាយទៅកាន់ប្រមុខរាជរដ្ឋាភិបាល សម្ដេចតេជោ ហ៊ុន សែន ពាក់ព័ន្ធទៅនឹងកំហុសនៃការផ្សាយរបស់ខ្លួន។

VOD បានឲ្យដឹងនៅលើហ្វេសប៊ុកផ្លូវការរបស់សារព័ត៌មានអនឡាញមួយនេះនៅល្ងាចថ្ងៃទី១២ ខែកុម្ភៈ ឆ្នាំ២០២៣នេះ។

ក្នុងសេចក្ដីជូនដំណឹងនោះ VOD បានសរសេរថា៖ «ក្រោយពីមានប្រតិកម្មពីលោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក និងលោកនាយករដ្ឋមន្ត្រី ហ៊ុន សែន ទៅនឹងអត្តបទដែល វីអូឌី បានចុះផ្សាយ កាលពីថ្ងៃទី៩ ខែកុម្ភៈ ឆ្នាំ២០២៣ ពាក់ព័ន្ឋនឹងការផ្តល់ជំនួយដល់ប្រទេសតួកគី ក្រុមការងារ វីអូឌី នឹងដាក់លិខិតមួយច្បាប់ជូនប្រមុខរាជរដ្ឋាភិបាល តាមរយៈខុទ្ទកាល័យនៅថ្ងៃអាទិត្យនេះ»។

ការប្រកាសរបស់សារព័ត៌មានអនឡាញVOD ខេមរៈភាសានេះគឺធ្វើឡើងបន្ទាប់ពីតំណាងស្ថាប័នមួយនេះបានជួបជាមួយនឹងមន្ត្រីក្រសួងព័ត៌មានកាលពីព្រឹកថ្ងៃទី១២ ខែកុម្ភៈនេះ។

នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានបន្ថយពេលវេលាឲ្យសារព័ត៌មានអនឡាញ VOD សុំទោសក្នុងរយៈពេល ២៤ម៉ោងវិញក្រោយពីមានអ្នកខំមិនម្នាក់ស្នើឱ្យរដ្ឋាភិបាលទុកពេលសម្រាប់ស្ថាប័ននេះបកស្រាយ។

គួរឱ្យដឹងផងដែរថាកាប់ពីថ្ងៃទី៩ ខែកុម្ភៈ សារព័ត៌មាន VOD ខេមរៈភាសាបានផ្សាយព័ត៌មានថាលោក ហ៊ុន ម៉ាណែត បានចុះហត្ថលេខាជំនួសនាយករដ្ឋមន្ត្រី សម្ដេចតេជោ ហ៊ុន សែន ក្នុងការផ្ដល់ជំនួយទៅកាន់ប្រទេសតួកគី។

ការនេះបានបង្កឲ្យមានការច្រានចោលពីលោក ហ៊ុន ម៉ាណែត ផ្ទាល់ហើយបន្ទាប់ពីនាយករដ្ឋមន្ត្រីសម្ដេចតេជោបានអញ្ជើញមកដល់កម្ពុជា សម្ដេចក៏បានប្រកាសទុកពេល ៧២ ម៉ោងឲ្យសារព័ត៌មានមួយនេះចេញមុខសុំទោសចំពោះរាជរដ្ឋាភិបាលនិងលោក ហ៊ុន ម៉ាណែត ផងដែរ។

បន្ថែមលើនេះសម្ដេចតេជោបានសរសេរនៅលើហ្វេសប៊ុករបស់សម្ដេចនៅថ្ងៃទី១២ ខែកុម្ភៈ ដោយវានកាត់បន្ថយពេលមកត្រឹម ២៤ម៉ោងប៉ុណ្ណោះ។

សម្ដេចថា៖ «ពេលនេះខ្ញុំសម្រេចកាត់បន្ថយពេលវេលាសូមទោសមកនៅត្រឹម ២៤ម៉ោងគឺកំណត់ត្រឹមម៉ោង១០:០០នាទីព្រឹកថ្ងៃទី១៣ ខែកុម្ភៈ ឆ្នាំ២០២៣វិញ»។

សម្ដេចក៏បញ្ជាឲ្យក្រសួងព័ត៌មានលុបចោលអាជ្ញាប័ណ្ឌផ្សាយរបស់ VOD តែម្ដង ត្រឹមម៉ោង១០និង០០នាទីថ្ងៃទី១៣ ខែកុម្ភៈ ឆ្នាំ២០២៣ ក្នុងករណីដែលសារព័ត៌មានអនឡាញនេះមិនបានធ្វើការសូមទោស។

សម្ដេចថា៖ «ដំបៅមិនឈឺកុំយកឈើចាក់។បើគង់តែពួកគេចោទថាខ្ញុំប្រើអំណាចខ្ញុំត្រូវតែប្រើអំណាចនេះដើម្បីបំពេញបំណងរបស់ពួកគេ»៕

ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានបន្ថយពេលវេលាឲ្យសារព័ត៌មានអនឡាញ VOD សុំទោសក្នុងរយៈពេល ២៤ម៉ោងវិញក្រោយពីមានអ្នកខំមិនម្នាក់ស្នើឱ្យរដ្ឋាភិបាលទុកពេលសម្រាប់ស្ថាប័ននេះបកស្រាយ។

សម្ដេចតេជោបានសរសេរនៅលើហ្វេសប៊ុករបស់សម្ដេចនៅថ្ងៃទី១២ ខែកុម្ភៈថា៖ «ពេលនេះខ្ញុំសម្រេចកាត់បន្ថយពេលវេលាសូមទោសមកនៅត្រឹម២៤ម៉ោងគឺកំណត់ត្រឹមម៉ោង១០:០០នាទីព្រឹក ថ្ងៃទី១៣ ខែកុម្ភៈ ២០២៣វិញ»។

បន្ថែមលើនេះសម្ដេចក៏បញ្ជាឲ្យក្រសួងព័ត៌មានលុបចោលអាជ្ញាប័ណ្ណបញ្ចប់ការផ្សាយរបស់ VOD តែម្ដង ត្រឹមម៉ោង១០ៈ០០នាទី ថ្ងៃទី១៣ ខែកុម្ភៈ ឆ្នាំ២០២៣ ស្អែកនេះក្នុងករណីដែលសារព័ត៌មានអនឡាញនេះមិនបានធ្វើការសូមទោស។

សម្ដេចថា៖ «ដំបៅមិនឈឺកុំយកឈើចាក់។ បើគង់តែពួកគេចោទថាខ្ញុំប្រើអំណាចខ្ញុំត្រូវតែប្រើអំណាចនេះដើម្បីបំពេញបំណងរបស់ពួកគេ»។

សារព័ត៌មានអនឡាញ VOD កាលពីថ្ងៃទី ថ្ងៃទី៩ ខែកុម្ភៈ ឆ្នាំ២០២៣ បានចុះផ្សាយដោយបានសរសេរថាខ្លួនបានយោងលើកឡើងរបស់អ្នកនាំពាក្យរាជរដ្ឋាភិបាល លោក ផៃ ស៊ីផាន បញ្ជាក់អំពីការផ្ដល់ជំនួយទៅកាន់ប្រទេសទួកគីដែលលោកថាការចុះហត្ថលេខាផ្ដល់ជំនួយដោយលោក ហ៊ុន ម៉ាណែត ទៅកាន់ប្រទេសតួកគីជំនួសសម្ដេចតេជោគឺមិនខុសនោះទេ។ ដែលការលើកឡើងនេះត្រូវបានអង្គភាពអ្នកនាំពាក្យរាជរដ្ឋាភិបាលច្រានចោល។

សារព័ត៌មានដដែលនេះបានបញ្ជាក់ថា៖ «ការលើកឡើងផ្ទុយគ្នានេះធ្វើឡើងក្រោយរដ្ឋាភិបាលកម្ពុជាប្រកាសផ្ដល់ជំនួយមនុស្សធម៌ចំនួន ១០ម៉ឺនដុល្លារ ដល់ប្រទេសតួកគី ដែលកំពុងរងគ្រោះរញ្ជួយដី ដោយក្នុងនោះ លោក ហ៊ុន ម៉ាណែត បានតំណាងឱ្យលោកនាយករដ្ឋមន្ត្រី ហ៊ុន​ សែន ក្នុងការចុះហត្ថលេខាផ្តល់ជំនួយ ខណៈលោក ហ៊ុន សែន កំពុងកាន់មរណទុក្ខចំពោះការបាត់បង់ប្អូនថ្លៃស្រី»។

ការចុះផ្សាយនេះបានធ្វើឲ្យលោក ហ៊ុន ម៉ាណែត ថាជារឿងមិនពិតស្នើឲ្យ VOD បង្ហាញភស្ភុតាង និងសុំទោស ព្រមទាំងធ្វើការកែសម្រួលពត៌មាននិងផ្សព្វផ្សាយជាសាធារណៈជាបន្ទាន់ ដើម្បីកុំអោយសាធារណៈមតិមានការយល់ច្រឡំក្នុងរឿងនេះ៕

ភ្នំពេញ៖ អង្គភាពអ្នកនាំពាក្យរាជរដ្ឋាភិបាលបានបញ្ជាក់ថា ប្រធានអង្គភាពលោក ផៃ ស៉ីផាន ពុំបានលើកឡើងថាលោក ហ៊ុន ម៉ាណែត បានចុះហត្ថលេខាជំនួស សម្តេចតេជោ នាយករដ្ឋមន្ត្រីឡើយ។

ក្នុងសេចក្ដីប្រកាសព័ត៌មានចុះថ្ងៃទី១១ ខែកុម្ភៈ អង្គភាពនេះបានបញ្ចាក់ថា៖ «ព័ត៌មានទាំងឡាយដែលថា ឯកឧត្តម បណ្ឌិត ហ៊ុន ម៉ាណែត បានចុះហត្ថលេខាលើឯកសារផ្ដល់ជំនួយជាការលើកឡើងរបស់អ្នកកាសែត ដែលគ្មានប្រភព ព័ត៌មានពិតប្រាកដ។ ដូចនេះ ព័ត៌មាន ដែលត្រូវបានផ្សព្វផ្សាយដោយវិទ្យុសំឡេងប្រជាធិបតេយ្យ (VOD) គឺជា ព័ត៌មានចចាមអារ៉ាម និងជាព័ត៌មានប្រឌិតក្លែងក្លាយ ដែលបំផុសឡើងដោយអ្នកសារព័ត៌មានវិទ្យុនេះតែប៉ុណ្ណោះ»។

ការប្រកាសនេះគឺបន្ទាប់ពីសារព័ត៌មានអនឡាញ VOD កាលពីថ្ងៃទី៩ ខែកុម្ភៈ ឆ្នាំ២០២៣ បានចុះផ្សាយដោយបានសរសេរថាខ្លួនបានយោងលើកឡើងរបស់អ្នកនាំពាក្យរាជរដ្ឋាភិបាល លោក ផៃ ស៊ីផាន បញ្ជាក់អំពីការផ្ដល់ជំនួយទៅកាន់ប្រទេសទួកគីដែលលោកថាការចុះហត្ថលេខាផ្ដល់ជំនួយដោយលោក ហ៊ុន ម៉ាណែត ទៅកាន់ប្រទេសតួកគីជំនួសសម្ដេចតេជោគឺមិនខុសនោះទេ។

សារព័ត៌មានដដែលនេះបានបញ្ជាក់ថា៖ «ការលើកឡើងផ្ទុយគ្នានេះធ្វើឡើងក្រោយរដ្ឋាភិបាលកម្ពុជាប្រកាសផ្ដល់ជំនួយមនុស្សធម៌ចំនួន ១០ម៉ឺនដុល្លារ ដល់ប្រទេសតួកគី ដែលកំពុងរងគ្រោះរញ្ជួយដី ដោយក្នុងនោះ លោក ហ៊ុន ម៉ាណែត បានតំណាងឱ្យលោកនាយករដ្ឋមន្ត្រី ហ៊ុន​ សែន ក្នុងការចុះហត្ថលេខាផ្តល់ជំនួយ ខណៈលោក ហ៊ុន សែន កំពុងកាន់មរណទុក្ខចំពោះការបាត់បង់ប្អូនថ្លៃស្រី»។

ការចុះផ្សាយនេះបានធ្វើឲ្យលោក ហ៊ុន ម៉ាណែត ថាជារឿងមិនពិតស្នើឲ្យ VOD បង្ហាញភស្ភុតាង និងសុំទោសព្រមទាំងធ្វើការកែសម្រួលពត៌មាននិងផ្សព្វផ្សាយជាសាធារណៈជាបន្ទាន់ ដើម្បីកុំអោយសាធារណៈមតិមានការយល់ច្រឡំក្នុងរឿងនេះ។

កាលពីល្ងាចថ្ងៃទី១១ បន្ទាប់ពីសម្ដេចតេជោ ហ៊ុន សែន ត្រលប់ពីចិនវិញបានប្រកាសទុកពេលឲ្យសារព័ត៌មាន VOD ៧២ម៉ោង សុំទោសរាជរដ្ឋាភិបាល និងលោក ហ៊ុន ម៉ាណែត ក្រោយពីបានចុះផ្សាយព័ត៌មាននេះ។ ផុតការកំណត់រដ្ឋាភិបាលអាចនឹងប្ដឹងទៅកាន់តុលាការ៕

ភ្នំពេញ៖ នាយករដ្ឋមន្ត្រី សម្ដេចតេជោ ហ៊ុន សែន ទុកពេលឲ្យសារព័ត៌មាន VOD សុំទោសរាជរដ្ឋាភិបាល និងលោក ហ៊ុន ម៉ាណែត ក្រោយពីបានចុះផ្សាយព័ត៌មានថា លោក ហ៊ុន ម៉ាណែត បានចុះហត្ថលេខាផ្តល់ជំនួយទៅតួកគីជំនួសនាយករដ្ឋមន្ត្រី។ ផុតការកំណត់រដ្ឋាភិបាលអាចនឹងប្ដឹងទៅកាន់តុលាការ។

សម្ដេចតេជោ ហ៊ុន សែន បានបង្ហោះលើហ្វេសបុកផេករបស់សម្ដេចនាថ្ងៃទី១១ ខែកុម្ភៈ ឆ្នាំ២០២៣ នេះថា សារព័ត៌មាន VOD អាចភ័ន្តច្រឡំ ឬមានចេតនាក្នុងការមួយបង្កាច់លើលោក ហ៊ុន ម៉ាណែត ឬរាជរដ្ឋាភិបាល ខណៈមានតែនាយករដ្ឋមន្ត្រីតែម្នាក់ប៉ុណ្ណោះមានសិទ្ធបញ្ជាចំណាយក្រោមច្បាប់ថវិការជាតិដែលជាអគ្គបញ្ជាការកំពូល។

សម្ដេចប្រកាសទុកពេលឲ្យសារព័ត៌មាន VOD ចំនួន ៧២ម៉ោងធ្វើការសុំទោស និងបានបញ្ជាទៅប្រធានមេធាវីរាជរដ្ឋាភិបាលលោក គី តិច ត្រៀមពាក្យបណ្តឹងទៅកាន់តុលាការក្នុងករណីមិនព្រមសូមទោស។

សម្ដេចតេជោបញ្ជាក់ថា៖ «សូមកុំថាយើងគំរាមឱ្យសោះ (សិទ្ធិរបស់អ្នកមានព្រំដែនជាមួយសិទ្ធិរបស់អ្នកដទៃ)។ មិត្តភ័ក្តបរទេស ឬសង្គមសុីវឹលមុនបញ្ចេញមតិសូមស្រាវជ្រាវរឿងនេះជាមុនសិនទាំងអង្គហេតុនិងអង្គច្បាប់។ ចុងក្រោយខ្ញុំសូមរំលឹកនូវពាក្យដាស់តឿនរបស់ខ្ញុំសម្រាប់អ្នកសារព័ត៌មានកាលពីថ្ងៃ១៤ ខែមករា ឆ្នាំ២០២៣ កន្លងទៅគឺ (អ្នកសារព័ត៌មានកុំបំពានអ្នកដទៃកុំបំភ្លៃការពិត)»។

សម្ដេចតេជោបញ្ចាក់ថា រដ្ឋាភិបាលមិនចង់បានអ្វីក្រៅពីភាពស្អាតស្អំនិងត្រឹមត្រូវនោះឡើយ។

កាលពីព្រឹកមិញអគ្គមេបញ្ជាការរងកងយុទ្ធពលខេមរៈភូមិន្ទនិងជាមេបញ្ជាការកងទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានស្នើទៅកាន់សារព័ត៌មាន VOD ឱ្យបង្ហាញភស្តុតាង បន្តាប់ពីបានចុះផ្សាយថាលោកធ្វើការចុះហត្ថលេខាផ្ដល់ជំនួយទៅកាន់ប្រទេសតួកគីជំនួសនាយករដ្ឋមន្ត្រី សម្ដេចតេជោ ហ៊ុន សែន។

លោក ហ៊ុន ម៉ាណែត បានសរសេរនៅលើ facebook page របស់លោកនៅព្រឹកថ្ងៃទី១១ ខែកុម្ភៈ ឆ្នាំ២០២៣ នេះថា៖ «ខ្ញុំសុំអោយវិទ្យុ VOD បង្ហាញឯកសារដែលបញ្ជាក់ថាខ្ញុំបានចុះហត្ថលេខាជំនួសសម្តេចតេជោប្រមុខរាជរដ្ឋាភិបាល ក្នុងការផ្តល់ជំនួយថវិកាទៅអោយប្រទេសតួគីដែលកំពុងរងគ្រោះរញ្ជួយដីផង ព្រោះខ្ញុំមិនបានដឹងរឿងនេះ ហើយខ្ញុំក៍មិនមានសិទ្ធិក្នុងការចុះហត្ថលេខាលើឯកសាររបស់រាជរដ្ឋាភិបាលដែរ»។

លោកថាលោកបានស្រាវជ្រាវរកឯកសារដែលពាក់ព័ន្ធ ប៉ុន្តែឃើញមានសេចក្តីប្រកាសពត៌មានរបស់ក្រសួងការបរទេសនិងសហប្រតិបត្តិការអន្តរជាតិតែមួយគត់ ដែលមិនមានហត្ថលេខាអ្នកណាទាំងអស់ និងថាបើ VOD មិនមានឯកសារ ហើយចុះផ្សាយពត៌មានមិនត្រឹមត្រូវ សូមធ្វើការ «សុំទោស» ព្រមទាំងធ្វើការកែសម្រួលពត៌មាននិងផ្សព្វផ្សាយជាសាធារណៈជាបន្ទាន់ ដើម្បីកុំអោយសាធារណៈមតិមានការយល់ច្រឡំក្នុងរឿងនេះ។

លោកបញ្ចាក់ថា៖ «ខ្ញុំមិនចង់បានអ្វីក្រៅតែពីការពារភាពត្រឹមត្រូវនិងច្បាស់លាស់ទេ»។

កាលពីថ្ងៃទី៩ ខែកុម្ភៈ ឆ្នាំ២០២៣ សារព័ត៌មានវីអូឌីបានចុះផ្សាយដោយបានលើកយកការលើកឡើងរបស់អ្នកនាំពាក្យរាជរដ្ឋាភិបាល លោក ផៃ ស៊ីផាន បញ្ជាក់អំពីការផ្ដល់ជំនួយទៅកាន់ប្រទេសទួកគីដែលលោកថាការចុះហត្ថលេខាផ្ដល់ជំនួយដោយលោក ហ៊ុន ម៉ាណែត ទៅកាន់ប្រទេសតួកគីជំនួសសម្ដេចតេជោគឺមិនខុសនោះទេ។

សារព័ត៌មានដដែលនេះបានបញ្ជាក់ថា៖ «ការលើកឡើងផ្ទុយគ្នានេះធ្វើឡើងក្រោយរដ្ឋាភិបាលកម្ពុជាប្រកាសផ្ដល់ជំនួយមនុស្សធម៌ចំនួន ១០ម៉ឺនដុល្លារ ដល់ប្រទេសតួកគី ដែលកំពុងរងគ្រោះរញ្ជួយដី ដោយក្នុងនោះ លោក ហ៊ុន ម៉ាណែត បានតំណាងឱ្យលោកនាយករដ្ឋមន្ត្រី ហ៊ុន​ សែន ក្នុងការចុះហត្ថលេខាផ្តល់ជំនួយ ខណៈលោក ហ៊ុន សែន កំពុងកាន់មរណទុក្ខចំពោះការបាត់បង់ប្អូនថ្លៃស្រី»៕